IRAKASLEARENTZAKO ORIENTABIDEAK


Sarrera
Orain aurkezten dugun ‘Unitate praktikoa: ekosistema’ deituriko materiala teknologia berriak eskolan erabiltzeko materialen artean txertatzekoa da.
Jada eskola guztietan daude ordenagailuak, baina horiek izatea ez da nahikoa teknologia berriak irakaskuntza-ikaskuntza prozesuan txertatzeko. Irakasleek horiek erabiltzeko baliabideak behar dituzte, eta gainera, euskaraz.
Guk eskaintzen dugun material honekin hutsune hauek beteko ditugu:
1- Irakasleek eskolan lan egiteko materiala eskura izango dute.
2- material landua topatuko dute; hau da, edukiak, helburuak, ariketak, azalpenak... landuta daude.
3- eta unitate horiek euskaraz daude


‘Ekosistemak’ unitate didaktikoaren helburuak eta edukiak

HELBURUAK

1. Izaki bizidun eta bizigabeak bereizten jakitea, ekosistema zer den definitzeko eta ekosistema bateko elementu biotiko eta abiotikoak sailkatzeko.
2. Gure inguruko ekosistema bereizgarrienak ezagutzea.
3. Euskal Herriko ekosistemarik bereizgarrienak ezagutzea eta kokatzea.
4. Ekosistema bateko izaki bizidun guztiak elikadura-kateen bitartez erlazionatuta daudela ulertzea.
5. Basoko eta padurako zenbait elikadura-kate ezagutzea eta, katean oinarrituz, elikaduraren piramidea eta sarea eraikitzea.
6. Ekosistema baten orekan, haren osagaiek duten eragina ezagutzea eta, ondorioz, elementu guztiak beharrezkoak direla jabetzea.
7. Ekosistema zerbait bizi eta dinamiko bezala hautematea, bere osagai guztien arteko elkarrekintzek duten eraginaren balorazio positiboa eginez.
8. Ekosistemen desagerpenean gizakiaren erantzukizunaz jabetzea, gure kontsumo- ohiturek arazo globaletan duten eragina ulertu eta baloratuz. *Berotze globala edo berotegi efektuarekin lotu daiteke> kutsaduraren u.d.-arekin.
9. Hipotesiak formulatzea eta jarrera zientifikoa erabiltzea, arazoen iturria bilatzeko orduan.

EDUKIAK.

1. Ekosistemen osagaiak
   - Elementu abiotikoak: tenperatura, prezipitazioak, argia...
   - Elementu biotikoak: mikroorganismoak, onddoak, landareak,
   eta animaliak.
2. Gure inguruko ekosistema batzuk:
   - Basoa: pagadia.
   - Padura
   - Beste ekosistema batzuk: itsaslabarra, basamortua, itsasadarra, hirikoa...
3. Elikadura-kateak
   - Elikadura-kateen egitura.
4. Elikadura-piramideak.
   - Elikadura-piramide baten egitura.
   - Ekosistemaren orekaren interpretazioa piramidearen bidez.
5. Elikadura-sareak
   - Elikadura-sare baten egitura.
   - Ekosistemaren orekaren interpretazioa sarearen bidez.
   

Interneten erabilera gelan, aukera desberdinak

Gaur egun eskola guztietan hainbat ordenagailu aurki ditzakegu, eta horien erabilera ez da oso argi ikusten askotan: irakasleak informazioa lortzeko, komunikatzeko tresna gisa, ikasleekin bilaketak egiteko... Hain aukera asko eskaintzen ditu irakasle asko sarritan itsasoan galduta bezala aurkitzen direla, probetxua nola atera jakin gabe. Unitate didaktiko hauen bitartez irakasleari teknologia berriak erabiltzeko aukera zehatz bat aurkezten dugu, gero beste aukera batzuekin bateragarria dena.


Metodologia

Unitate didaktiko hau lantzeko, ikasle bakoitzak ordenagailuan azalduko zaizkion ariketak landu beharko ditu, eta bukatzean, lortu dituen emaitzak eta idatzi dituen erantzunak jasoko ditu. Ordu beteko lana da gutxi gorabehera, eta ikasleak bakarka edo binaka lantzeko pentsatuta dago.
Irakaslearen papera ez da ordenagailuen gelan egotera mugatuko, bera izango baita ikasleei aurrera egiten eta beharrezkoa denean azalpenak emango dituena. Bukatzean, ikasle bakoitzak egin dituen lanak jaso ahal izango ditu.
Ebaluatzeko orduan puntu desberdinak izan beharko ditu kontuan:

1. Ariketa batzuen emaitzak: Automatikoki jasoko ditu, zuzenduta.
2. Ikasleek idatzitako emaitzak: Ariketa guztiak ez dira klik egitekoak izango, askotan galderei erantzun egin beharko diote.
3. Ikasle bakoitzak gelan izan duen jarrera (interesa, beste ikaskideekin izandako harremanak eta abar).

Nola funtzionatzen du?

Unitate didaktikoa lantzea oso erraza da, zoaz “Unitate praktikoa” loturara eta hasi ariketak egiten. Bat bukatzean bestea agertuko da, unitate didaktiko osoa bukatu arte. Orduan, emaitzak inprimatu ahal izango dituzu.


Kontaktua

Edozein arazo, iradokizun eta abarretarako: laguntzateknikoa@elhuyar.com